tumse kya shikayat karun ke tum badal gaye ho...

haalaat yeh hai ki. hume khud ki khabar nahin...

Ye baadal insano se nazar aa rahein hain...

kudh to badal rahein hain pal pal mein..

Mujhe yaad gar jo hota.. tera naam kyon na leta..

Mera sawal yeh hai ki skaksh hun main kaun...

tujhpar ilzaam lagaata...to badnaam khud hota....

mehfion mein hain jaantey... mere naam se tujhe....

woh kuch likh raha thha gaadi ke dhuul bhare sheeshe pe apni choti choti unglion se......

mein ab tak yeh sochta thaa ..... ke shayar akelaa hun main.....

inn haaton ki lakiron se waqif nahin hun main.......

yeh woh shair hain khuda ke........ jinhe padh na paaya main .......

Fir ikkatthe hue hain kisi kone mein raqeebon (dushmano) ki tarah......

Yeh labz kambkhat dil se zubaan tak pahunchein to sahi.....

office ki mez(table) aur kursiyon se din bhar bahut pyaar kiya .....

raat mein to kuch ghar se wafaaein ki jaay..

Maine orkut pe bahut doondha usse.. par wahan se wo kab ka ja chuka tha...

facebook pe bhi gaya main... logon ne kaha.... jyada dikhtaa nahin aajkal..

twitter pe bhi kai dino se khaamosh tha woh....

pehle ruth tey thhey to ghar chhod kar jaate thhe...

naa jaane log ruthkar kya kya chhod jatein hain aaj....

ussne subah subah khaali scooter der tak hilaayaa....

bacche samajdaar thhe..... school paidal nikal gaye....

main dhuuon se fark kartaa hun... gharon mein...

kahin chilam... kahin chulhe.... kahin khwaab.... kahin insaan jal rahein hain..

Siyaasaton ki aag mein bujh gayein kai chulhe......

Zaruraton ki baarish mein... kai khwaab jal gaye...

Raat ke panchi.. phir udein hain..... Alfaazon ka danaa chugne.....

Ghonsla kahin afsaano ka... ban ne ko hai..

Daftaron mein kahin Qaid hain... Zindagi ki roohein...

Isse sadko pe... Kheto mein.... Taaron ki chhat ke neechee le jaao ... yaaron...

Log sochte rahe..... Saansein ab bhi baaki hai......

Katl bhi kiyaa ussne to ... Hasta Chhoda mujhe....

Subah ka sooraj.. ab kuch garm sa hone laga hai.... chiddiyon ki aawaaz bhi dhundhli si hone lagi hai...

Khwaab koi raat ka .... puraa hone ko hai...

Kuch phate puraane mailay se note.... woh mutthi mein dabay chala jaa raha thaa....

Daulaton to apnii chupaa raha thaa....

Bas kitaabein hi nahi thhi school ke bastey mein .....

Daatein thhi kuch maa ki.... mor ka ek pankh thha...

Puraane kagaz ke kuch khilone bhhi thhe...

Woh jab gaya , garm chaadrein chhod gaya thha yaadon ki...

Takiye de gaya thha sapno ke...

Na jaane phir bhi kyon..... Neend naa aayi.. raat bhar.....

yaad nahin ... gum kyaa thaa... kuch to thaa...

kuch kaha to thha usne.... par dohraayaa nahin thaa....

deevar pe lage calendar ka... aaj palat gayaa panna....

naya mahina paidaa hua hai .... nayi zaruratein.. phir saans lengi.....

Mud ke zamane ki taraf dekha na thha usne.....Woh jab aaya thaa paas mere .....

Woh gaya to apni harkat phir dohra gaya mujh par.....

Gaur se inko chunaa kijiye....

Deewaarein ghar banati hain ... to giraati bhi hain....

khaamosh karte thhe jo kabhi mehfilon mein....

aaj kitaabon mein dhoondhtey hain mujhe....

Labon to yeh gilaa hai aakhon se....

ke woh jyadaa bolti hain...

sach bolti hain....

behtar bolti hain..

Chotu !!

Woh likh raha thaa kuch panno mein..

Haath mein ek chai ka gilaas liye....

Kisi akhbaar ka lekhak thha shayaad...

Baal mazdoori par koi article likhnaa thha usse...

Chai ki chuskiyaan lete hue usne kaafi kuch likh daala....

Khaali glaas bench par rakha... aur piche muud kar chillaayaa....

Chotu !!!!!! ek chaai aur laanaa....

Chalo duniya ke ab sapne bulaa rahein hain.....

Neendo se wafa thodi.... aaj karne do mujhe....

muddatein hui hain ... gum se judaa huey...

Yeh phir darwaaze pe aaj ... dastak kaun de gaya...

koshish zara si karta .... to mil hi jaataa mein..

usne apni aakhon mein... kabhi dhoondha nahin mujhe...

Khuda jaise mujhse pesh aa rahein hain woh.....

Tamaam minnatein meri... thukraa raahein hain woh...

Kis ka vaasta dekar mein roktaa usse.....

Khuda tak to woh.. ban chuka thha mera...

Jaanta hun tum bhul jaaogi mujhe....

Kabhi na kabhi to mil hi jaaunga tumhe.... Kitaabon mein dabe unn sukhe phoolon ki tarah.....

Naa koi khusi rahi... Na koi ummed.... Na Arzooo...

Woh jab gaya... sab le gaya mera...

mein bayaan karta raha apnaa haal sheron mein.....

woh samajhta raha labzon ki jaadugari isse.....

Kaagaz pe kuch chhod jaa raha hun tumhaare liye...

labzon ke siva mere paas kuch aur naa thha..

Stool pe chhad kar, bulb utaarte hue woh gira hai abhi....

Jo kabhi kehta thha aasmaan se ... taare tod ke laayega....

So na jaayein bhooke bachhe intezaar karte karte...

aawaaz bartano ki aati rahi rasoi se tab talak...

Bas paanch rupey ka sikka uski hatheli par rakh kar jo chamak dekhi uski aakhon mein....

khusi mili woh mujhe jo tab bhi nahin mili thi jab sone ke sikke kharide thhe bazaaron se maine.....

Gaur se dekho to bachhon ki aakhon mein bhi mil jaati hai....

Khushi iss tarah yuun.. bazaaron mein nahin milaa karti....

Jismo ko bikte dekha... ruhon ko bikte dekha...

Rikshe ke peeche bandhe chaddar ke jhoolon mein...

neendo ko bikte dekha.....

Tujhse kya shikaayat karun e khuda...

ke masjid ki lambi qataaron mein.....

tujhko bhi...