Aakhri Bus

Aakhri Bus

Woh roz.. usi paan ke dukaan par aataa thha... shaam ko der raat cigarette peene...

Aaj bhi usi dukaan ke paas bane chabutare par baith kar woh... muh se dhuaan udaate hue.. guzre hue din ke baare mein soch raha thha... aaj tankhwa aai thhi.. pehli tarikh thhi.. shayad kharchon ke baarein mein soch raha thha..

Ek ladka, 20-22 saal ke lagbhag ka ..paas aakar 25 rs maangne laga.. hairan ho kar usne puchaa.. 25 rs ..?? abe itne paise koi maangta hai kya kabhi.. tu to theek thaak ghar ka lagta hai.. itni raat mein bheek maang raha hai....

saab, mein iss busstop pe bahut der se khada hun.. aur kisi ne ye bola hai ki.. ab bus nahin aaeygi. aakhri bus thhi saab... woh riksha walaa 50 rs maang raha hai... mere paas sirf 25 hi hain... Chaal be, tere jaise roz aatein hain... saale naya tarika hai bheekh maangne kaa.. woh cigarette ka dhuaan muh se baahar nikaalta hua gusse se bola...

Saab, mein kal isi jagah aapko lauta dunga... mein jhooth nahin bol raha hun.. raat hai isliye rikshaw waala advance maang raha hai.. nahin to mein usse ghar jaa kar de deta... please saab.. thodi help kijiye naa..

chal be.. bhaag.. kuch nahin milegaa.. usne cig ko pair ke neeche dabaate hue.. zor se kaha, aur sadak paar karta hua apne ghar ki taraf.. jaane laga... tabhi kuch zor se aawaj hui....

aakh khuli to apne to aspataal mein pada hua payaa usne.... chot jyada to nahin lagi thhi.. takkar lag gayi thhi kisi gaadi se.. thodi si kharonchein thhi haathon mein aur maathe pe thodi soojan thhi... shayaad takkar ki wajah se behosh ho gaya thha woh.... tabhi achanak khayal aayaa.. hath mein ghadi dekhi .. gale mein sone ki chain dekhi.. sab thha.. par.. purse??? purse gayab thha... usne apni sabhi jebon mein dekha.... par purse nahin thha.. pure mahine ki tankhwa thhi usme..

Saala woh ladka.. le gaya lagtaa hai... pure.. 8000 rupay thhe usme.. maje ho gaye saale ke...

Tabhi nurse daudti hui andar aayi.. bola aap late jaaiye... aapko abhi aur aaram ki zarurat hai.. kuch reports aani baaki hai..

Nurse.. Mera purse .. mera purse gayab hai.. kaafi paise pade thhe usme.. Nurse haste hue boli.. arrey haan... woh mere paas hai... ek ladka kal tumhe yahan le kar aaya thha.... usne yeh mujhe diya thha sambhalne ke liye... nurse ne purse usse haathon mein dete hue kaha...

Usne jhat se woh purse liyaa aur paise gin ne laga.... pure paise gin ne ke baad... woh khaamosh sa ho gaya... aankhein bheeg aayi uski....

.

.

.

.

.

purse mein 25 rs ... kum thhe....

.

.

.

.

.

.

.

.

.

Woh itna hi jaanta thha ki purse mein sirf 25 rs kum thhe.. par woh yeh nahin .. jaantaa thha ki.. jis bus se pichli raat takkar hui thhi... woh uss raat ki aakhri bus thi...

Laqeerein

Beta bada utsuk thha... apne haat ki laqeeron ko dekh kar kuch soch raha thha..

khelte khelte achanak hi nazar pad gayi thhi apne haathon par... daudta hua ghar ke andar gaya...

akhbaar padh rahe pitaa ke paas jaa kar dono haath dikhaate hue bola... papa yeh kya hai.... pita halka sa muskuraaya... bola "Beta yeh tumhaare haath hain..."

"Arrey papa nahin yeh, inn haathon mein kya hai"

Pita phir hasaa aur usse god mein le liya.. uske dono nanhe haath apne haathon mein liye.. aur apne chehre ke paas le gaya... "Beta yeh laqeeren hain... jitni jyaada laqeeren utnaa hi mein tumse pyaar kartaa hun"...

Beta bahut khush hua... ek ek laqeer ko dikhaane laga apne pita ko.. "Papa idhar dekho, idhar bhi, arrey yahaan bhi hai!" kitni saari laqeeren hain... " Aap mujhse kitna pyaar kartein hain naa."

Bahut khush thha baap, ki apne bete ko itni achhi tarah se samjhaa payaa...

Beta apne haathon ki taraf dekhte hue.. daudta hua bahar chalaa gaya...

Shaayad , apne doston ko bataane gaya thha...

Yahaan ghar mein bhaitha pita.. ab bhi khush ho raha thha .. pyaar kya hai .. bahut achhi tarah se samjhaaya usne apne bete ko... Woh anadar hi andar khud par garv kar raha thha ki...

beta phir ghar ke andar daudta hua aayaa ....pita ke saamne khada hogaya ...

aur haafte hue kaha....

"Papa daadi ke haathon par bhi laqeerein thhi.. aur unke to chehre par bhi... kitni saari laqeeren thhi...

phir woh... humaare saath kyon nahin rehti... akeli kyon rehti hain...." ??

na jaane kitni kahaaniyaan bani hongi aaaj.....

na jaane kitne ... ghar der se laute honge....

bacche na hindu.. na muslmaa hotein hain...

schoolon tak kahaan... aaawaz pahunchti hai mandiron aur masjidon ki.

kuch sochta sochta... so gaya woh raat mein....

din ne shaayad... bahut badsaluki ki thhi uss se....

bacche na jaane aaj kal.. ghar mein baithe baithe... video game ke record todte rehtein hain ....

hum to pedon se aam.... aur khidkiyon ke sheeshe toda karte thhe...

dhuul lage bartan ... roz koi nai kahaani pakaatein hain rasoi mein....

woh der se aataa hai raat mein aur... bhuka so jaataa hai...

Woh tumhaari Galti thhi... Aur Mera pyaar....

film nayi thhi.. logon ko pasand bhi aayi... khoob shor machaaya logon ne har gaane par...

Bacche ko god mein lekar baithi ek maa.... usse chup karaane ki koshish kar rahi thhi...

bahut hilaayaa.. sahlaayaa... par woh so nahin rahaa thha. shor bahut thha....

film nayi jo thhi...

maa bacche ko god mein lekar seat se uthi... aur .. use sehlaate hue.. hall ke baahar aayi...

shor kam thha... woh bacche ko apne haathon mein hilaate hue idar udhar ghoomti rahi...

ussi cinema hall ke baahar...ek kamzor saa admi.. maiele kuchele phate kapde pehne hue..

cycle le kar khadaa thha...

cycle ki aage waali seat par..ek chota sa bachha handle par sar rakh kar sone ka natak kar raha thha.. jee haan natak...

woh aadmi bheed mein idhar uhar cycle le jaakar bacche ki taraf ishaara karta hua haat failaa raha thha...

kuch paise mil jaay usse ..... to shayaad uss bachhe ko sone ka natak naa karna pade..

kuch bacchon ko sulaane ke liye.... bheed se nikaalna padta hai.... aur....

kuch ko bheed mein daalna..................

Hidaayatein dijiye... to hidaayaton ki tarah...

Na mein khada hun aapki chokhat pe.. na aapne dukaan khol rakhi hai..

Sher likhna chaahun... to roz likhun mein....

par kuch din mere... acche bhi guzar tein hain aksar..

Inton se.. ret ke dher pe raaste banaakar khush ho jaate hain..

Bachhe... mazduron ke.. khilone nahin maangte...

kuch saamaan... ghar se... aaj nikaal liye gaye....

yaadon se bharaa pada hai aaj ghar...

waqt lagta hai unhe.. bharne mein...

jakhm jo nazar nahin aate....

Istihaaron mein kahin dab gayi hain khabrein...

Haalaaton ka aaj... kisi ko pata nahin....

Woh ek puraani si sadak ke kinaare... apne dono ghutne muh tak samet kar baitha thha.. budhaa sa lag raha thha...

baal safed .. badhi dhaadi... aur adh khuli jhurriyon waali aakein.. thandi ka mausum thha... tan pe kuch kapde to thhe.. par shaayad kaafi nahin thhe.. thithur raha thha ab bhi woh... do din se bhookha thha.. isliye.. thandi ki fikr nahin thhi usse..

bass aane jaane waali gaadion par nazar thhi.. ki kahin kisi gaadi se koi.. kuch khaana fenkh de... haa fenkh hi de.. woh uun hin pada raha.. gaadion ko dekhte hue.. shaayad itni bhi taqat nahin bachi thhi usme ke hil sake... bas palkein hi jhapak raha thha woh..

Ek hawaldaar tabhi sadak ke dussre aur aa kar khada ho gaya... roz to aisa nahin hota thha... pas koi bandobast hoga shaayad.. neta koi aane waala hoga shaayad...

Tabhi.. ek badi si gaadi uss hawal daar ke paas aakar ruki... koi raasta puch rahaa thha... ek chhote bacche ne apne chhote se haantho ko gaadi se bahar nikaalaa aur kuch sadak ke kinaare phenk diya.. Gaadi aage nikal gayi... Uss budhe ki nazar padd chuki thhi uss khaane par...

Usne ungalian hilai pairon ki... aur gutne chehre se duur kiye... kareeb dus minute tak usne bahut koshih ki.. dheere dheere khada hua ... pair ladkhada rahe the... taqat zaraa bhi nahi thii.. par... iss se pehle ki koi .. jaanwar uss khaane tak pahunche.. usse uss phenke hue khaane tak pahunchnaa thha...

woh hilte dulte.. ladkhadaate hue... sadak paar karne lagaa... tabhi hawaldar ki nazar uss par padi... gusse se hawaldaar ka chehraa tamtamaa gayaa... woh daudta hua .. uss ladkhadaate hue budhe ke paas aaya.. danda ghumaa ke budhhe ko sadak par hi giraa diyaa..

aur gusse se chillaayaa

" Saale Jab khud ko nahin sambhaal saktein... to itni peete kyon hai.."

My dad wrote this..

Ek chhote se kamre mein.... na jaane woh kaise rehtein hain....

itne saare khwaabon ke saath....

We should treat life , like we treat our luggage at Railway Station..

Keeping an eye on it always......holding it tightly.... trusting it only with those who are close...

Not like we treat lugguage at airports

Waiting for it.... watching at other's.. thinking its ours......

and cursing when we are the last one to find ours....

Kya khareeda aapne..

aaj woh bete ko school chhodne phir ghar se niklaa....

thodi jaldi mein thha shyaad... helmet ghar par hi bhuul gaya...

kuch duur jaane par chowrahe par police waale ne haat dikhakar roka...

ussne jeb se Pacchaas rupey nikaale... aur police waale to thamaate hue aage nikal gaya...

bachha chhota thha... maasum thha..

jab school aaya to scooter se utar te hue.. puchha ...

"papa .. uss chouraahe pe kya kharidaa aapne ??"

Tazub hai zindagi kitni dur khhinch le gayi unhe...

Shehron mein rehne waale kheton mein photo khincha rahein hain....

Sote sote raat mein.... woh jaag jaataa hai aksar...

Khuda beti de garib ko... to darwaaza bhi de....

naam tera naa leta to kya kartaa...

mujhe apna kuch yaad thha kahaan..

insaa hun mein.... andheron mein kaise naa bikhar jaaun...

maine taaron ko bhi tuut te dekhaa hai aksar raaton mein....

Raat gehri si hai... Sannataa sa phir hone ko hai... aayeenge "sab ke sab" phir se..

Din mein Khuda jaane yeh "khayaal"... jaatein kahaan hai..

chalon yun kartein hain... ishq pe ilzaam laga detein hain...

phir tum apni raah... mein apni....

Jab akela sa hota hun raaton mein... to khud ko paata hun....

Bheed mey aksar mein kahin kho jaata hun....

apne bachhon ke liye mehngi dukaano mein khilone dhoodhte hain...

jo samandar ki reton se khelte thhey kabhi....

Khud ka pet bharne ke liye... ussne hawa tak bech daali ....

Gubbaron mein bhar kar...

raat ka kya hai kal phir aayegi....

aaj nindon ki baat suni jaay...

maine sambhaal ke rakhein hain kuch puraane khat or lifafe...

kal bacche yeh naa puch le ... Daakiyaa kaun thha....

jo sochtaa thha bol detaa thha.....

bachpan ki aadatein kuch theek hi thi..

bachpan mein kahin... chhoooot gayaa thha peeche...

niklungaa ghar se... phir aaj.. itwaar dhoondne ko....

maa ke dibbae ka mazhab hain hota....

school mein .. mein aur aslam.. saath hi khaate thhe...

maa puchti nahin tankhwa aai ki nahin...

woh ek rupiya na mile mujhe to sar pe ghar uthaa leti hai....

ghar naa jaaun kisi ke to ruuth jaatein hain...

gaaon mein ab bhi woh tehjeeb baaki hai....

Ramayan ki kitaabein khareedne lagi hain maaein baazaaron se....

Jabse bacche Ra.One dekh aayein hain cinemaon mein.....

kuud jaatein hain hawaaon mein parinde...

ghonslon mein seekhe... kaise udaan koi...

chhat pe jaa kar.... woh maangta hai muraadein tut te taaron se....

bhuul jataa hai ki ... khule aasmaa ke niche bhi... sotein hain kai...

bachpan mein kahin... chhut gayaa thha peechee...

niklungaa ghar se... phir aaj.. itwaar dhoondne ko...

woh puchte nahin uss se.... ke ghar kab lautega...

bacche ab deevar pe tange calendar ki... chuttiyaan gin letein hai....